प्रहरी महानिरीक्षक कार्कीबाट नक्सालमा मौलो पूजा, प्रहरी कर्मचारीलाई पुरस्कार

काठमाडौँ। प्रहरी महानिरीक्षक दानबहादुर कार्कीले बडादसैँका अवसरमा मंगलबार नेपाल प्रहरी सशस्त्र प्रहरी गण नम्बर १, नक्सालस्थित मौलोमा पूजाअर्चना तथा सङ्कल्प पूजा गरेका छन् ।

नेपाल प्रहरीले परम्परागत रूपमा गर्दै आएको पूजाअर्चनाका क्रममा प्रहरी महानिरीक्षक कार्कीले बलि पूजा गर्नुका साथै निशानमा पञ्जाछापसमेत लगाएका छन् ।

मौलो पूजाका अवसरमा विशेष कार्य गर्ने प्रहरी हवल्दार रामकुमार कार्कीलाई पगरी तथा नगद पुरस्कार र प्रहरी हवल्दार पोषणराज बुढाथोकीलाई नगद पुरस्कार प्रदान गरिएको छ ।

सो अवसरमा प्रहरी महानिरीक्षक कार्कीसहित प्रहरी अतिरिक्त महानिरीक्षकहरू तथा वरिष्ठ प्रहरी अधिकृतहरूले मौलो परिक्रमा गरेका थिए । पूजा विसर्जनपछि मूलकोत हनुमानढोकाका लागि निशान प्रस्थान गराइएको थियो । उक्त अवसरमा पुजारीबाट टीका तथा प्रसाद ग्रहण गरिएको थियो ।

नेपाल प्रहरीको निशान नेपाली सेनाको रामदल पल्टनबाट आएको हो । यसमा दुई वटा निशान रहेका छन् । मुख्य निशानमा सूर्य र चन्द्रको बीचमा रामधनुषको चिह्न अंकित हुन्छ भने सहायक निशानमा सूर्य र चन्द्रका चिह्न अंकित हुन्छन् ।

राष्ट्र र नागरिकको शान्ति सुरक्षा तथा अमनचयन कायम राख्ने जिम्मेवारी पूरा गर्न सफलता प्राप्त होस् भन्ने कामनासहित निशान झण्डालाई शक्तिपीठ र इष्टदेवताको प्रतीकका रूपमा पूजा गर्ने परम्परा रहेको नेपाल प्रहरीले जनाएको छ।

सङ्गठनको कार्यसम्पादनमा कुनै अनिष्ट नहोस् र सम्पूर्ण कार्यमा सफलता प्राप्त होस् भन्ने उद्देश्यले निशान झण्डाको पूजा गरिँदै आएको छ ।

नेपाल प्रहरीले विक्रम संवत् २०११ सालमा निशान झण्डा प्राप्त गरेपछि हरेक वर्ष बडादसैँ र चैतेदसैँमा मौलो पूजा गर्दै आएको छ । देशभरका विभिन्न प्रहरी कार्यालयमा रहेका मौलोमा पनि आज विधिपूर्वक पूजा सम्पन्न गरिएको नेपाल प्रहरीले जनाएको छ ।